'ഇത് നാണക്കേട്'; കാരിക്കിനെ ചോദ്യം ചെയ്ത ഫെർണാണ്ടസിനെതിരെ ആഞ്ഞടിച്ച് കാരാഗർ

Photo: Sky Sports

കോമോയിലെ 4–1 നാണംകെട്ട തോൽവിക്ക് പിന്നാലെ മാഞ്ചസ്റ്റർ യുണൈറ്റഡ് ക്യാമ്പിൽ പൊട്ടിത്തെറി തുടരുന്നു. പരിശീലകൻ മൈക്കൽ കാരിക്കിന്റെ തന്ത്രങ്ങളെ പരസ്യമായി ചോദ്യം ചെയ്ത ക്യാപ്റ്റൻ ബ്രൂണോ ഫെർണാണ്ടസിനെതിരെ മുൻ ലിവർപൂൾ താരവും പണ്ഡിറ്റുമായ ജെയ്മി കാരാഗർ രൂക്ഷമായ ഭാഷയിലാണ് ആഞ്ഞടിച്ചത്. ഫെർണാണ്ടസിന്റെ പ്രതികരണം "നാണക്കേട്" ആണെന്നും ഇത്തരം മനോഭാവം ഒരു യുണൈറ്റഡ് ക്യാപ്റ്റന് ചേരില്ലെന്നുമാണ് CBS സ്പോർട്സിൽ കാരാഗറുടെ വിമർശനം.

മത്സരശേഷം ഫെർണാണ്ടസ് പറഞ്ഞത്, മാൻ-ടു-മാൻ പ്രസ്സ് ചെയ്യേണ്ടതില്ലെന്നത് പരിശീലക സംഘത്തിന്റെ തീരുമാനമായിരുന്നുവെന്നും എതിരാളികൾക്ക് ഇടം കൊടുത്തത് അവർക്ക് ആത്മവിശ്വാസം നൽകിയെന്നുമാണ്. 67-ാം മിനിറ്റിൽ, സ്കോർ 3–0 ആയിരിക്കെ പിൻവലിക്കപ്പെട്ട ക്യാപ്റ്റന്റെ വാക്കുകൾക്ക് കാരിക് മറുപടിയും നൽകി — ഏത് സിസ്റ്റം കളിച്ചാലും ഓടാത്ത ടീമിന് ജയിക്കാനാവില്ലെന്നായിരുന്നു പരിശീലകന്റെ പ്രതികരണം.

കഴിഞ്ഞ സീസണിൽ ഫെർണാണ്ടസ് ടീമിന്റെ മികച്ച കളിക്കാരനായത് കാരിക് വന്ന് അദ്ദേഹത്തെ ശരിയായ പൊസിഷനിൽ കളിപ്പിച്ചത് കൊണ്ടാണെന്ന് കാരാഗർ ചൂണ്ടിക്കാട്ടി. പകരക്കാരനായി പുറത്തായതിന്റെ നാണക്കേടാണ് ഈ പ്രതികരണത്തിന് പിന്നിലെന്നും, മാനേജരെ ഇങ്ങനെ ചോദ്യം ചെയ്യുന്നത് ഒട്ടും ശരിയല്ലെന്നും അദ്ദേഹം പറഞ്ഞു.

പ്രസ്സിങ്ങിനെ കുറിച്ച് പറയുമ്പോൾ, വർഷങ്ങളായി യുണൈറ്റഡിന് പ്രസ്സ് ചെയ്യാനാവാത്തതിന്റെ ഒരു കാരണം ഫെർണാണ്ടസ് തന്നെയാണെന്നും കാരാഗർ ആരോപിച്ചു. സ്കൂൾ മൈതാനത്തെ കുട്ടിയെപ്പോലെ മൈതാനമാകെ ഓടുന്നത് കഠിനാധ്വാനമല്ല, അത് ടീമിനെ തന്നെ ദോഷകരമായി ബാധിക്കുകയാണെന്നും സഹതാരങ്ങളെ നോക്കി നിരന്തരം കൈ ഉയർത്തുന്ന ശീലം ക്യാപ്റ്റന് ചേരില്ലെന്നും അദ്ദേഹം കൂട്ടിച്ചേർത്തു. ലീഗുകളും യൂറോപ്യൻ കിരീടങ്ങളും എല്ലാ വർഷവും നേടാതിരുന്ന കാലത്തും ബ്രയാൻ റോബ്സൺ ഒരിക്കലും മാനേജരെയോ സഹതാരങ്ങളെയോ ഇങ്ങനെ കുറ്റപ്പെടുത്തിയിട്ടില്ലെന്നും കാരാഗർ ഓർമ്മിപ്പിച്ചു.

ഒരാഴ്ചയ്ക്കിടെ പരസ്യ വിമർശനവുമായി രംഗത്തെത്തുന്ന രണ്ടാമത്തെ യുണൈറ്റഡ് താരമാണ് ഫെർണാണ്ടസ്. അത്‌ലറ്റിക്കോ മാഡ്രിഡിനോട് 2–0ന് തോറ്റതിന് പിന്നാലെ ക്ലബ് നേതൃത്വത്തെ വിമർശിച്ച ലിസാന്ദ്രോ മാർട്ടിനെസ് പിന്നീട് മാപ്പ് പറയേണ്ടി വന്നിരുന്നു.

അതേസമയം, കാരിക്കിന്റെ ഭാവിയും അപകടത്തിലാണെന്നാണ് കാരാഗറുടെ വിലയിരുത്തൽ. ഇത്ര മോശം ഫലവും പ്രകടനവും പരിശീലകന് ഗുരുതരമായ പ്രത്യാഘാതങ്ങൾ ഉണ്ടാക്കിയേക്കാമെന്നും മറ്റൊരു യുണൈറ്റഡ് മാനേജർ കൂടി പുറത്താകുന്ന അവസ്ഥയിലേക്കാണ് കാര്യങ്ങൾ നീങ്ങുന്നതെന്നും അദ്ദേഹം പറഞ്ഞു. ഞായറാഴ്ച ബോൺമൗത്തിനെതിരായ മത്സരത്തിന് മുമ്പ് തന്നെ കാരിക്കിന്റെ ഭാവിയെ കുറിച്ച് ക്ലബിൽ ചർച്ചകൾ നടന്നേക്കുമെന്ന റിപ്പോർട്ടുകൾക്കിടെയാണ് ഈ വിവാദം ശക്തമാകുന്നത്.