Photo: Getty Images
മാഞ്ചസ്റ്റർ യുണൈറ്റഡ് വിട്ടതിന് ശേഷം മാസങ്ങളായി ക്ലബ്ബില്ലാതെ നിൽക്കുന്ന ഇംഗ്ലീഷ് വിങ്ങർ ജെയ്ഡൻ സാഞ്ചോയ്ക്ക് സ്പാനിഷ് ക്ലബ്ബ് ഗെറ്റാഫെയിൽ നിന്ന് ഔദ്യോഗിക ഓഫർ ലഭിച്ചതായി റിപ്പോർട്ട്. സ്കൈ ജർമ്മനിയെ ഉദ്ധരിച്ച് ബിബിസിയാണ് ഈ വാർത്ത പുറത്തുവിട്ടത്.
26-കാരനായ സാഞ്ചോയുടെ യുണൈറ്റഡ് കരാർ ജൂണിൽ അവസാനിച്ചതോടെയാണ് അദ്ദേഹം ഫ്രീ ഏജന്റായത്. കഴിഞ്ഞ സീസണിൽ ആസ്റ്റൺ വില്ലയിലായിരുന്നു അദ്ദേഹം ലോണിൽ കളിച്ചത്. പുതിയ ക്ലബ്ബ് ഏതെന്ന് തീരുമാനിക്കും മുമ്പ് ഗെറ്റാഫെയുടെ ഓഫർ തന്റെ പ്രതിനിധികളുമായി ചർച്ച ചെയ്ത് പരിഗണിക്കുകയാണ് താരമെന്നാണ് റിപ്പോർട്ടുകൾ പറയുന്നത്.
മുൻ റയൽ മാഡ്രിഡ് ക്യാപ്റ്റൻ ഡാനി കാർവഹാളിനെ ഈ മാസം ടീമിലെത്തിച്ച ഗെറ്റാഫെ, ഇപ്പോൾ സാഞ്ചോയെയും സ്പെയിനിലേക്ക് കൊണ്ടുവരാൻ ശ്രമിക്കുകയാണ്. ലാ ലിഗയിൽ കളിക്കാനുള്ള അവസരം സാഞ്ചോയ്ക്ക് കരിയർ പുനരുജ്ജീവിപ്പിക്കാനുള്ള വലിയൊരു വേദിയാകും.
ബൊറൂസിയ ഡോർട്ട്മുണ്ടിൽ താരമായി ഉയർന്ന സാഞ്ചോയ്ക്ക് യുണൈറ്റഡിൽ പ്രതീക്ഷിച്ച തിളക്കം കണ്ടെത്താനായില്ല. ഡോർട്ട്മുണ്ടിലേക്കും ചെൽസിയിലേക്കും വില്ലയിലേക്കുമുള്ള ലോൺ കാലഘട്ടങ്ങൾക്കിടയിലും സ്ഥിരതയാർന്ന ഫോം അകന്നുനിന്നു. ഗെറ്റാഫെയുടെ ഓഫർ സ്വീകരിക്കുമോ എന്നതാണ് ഇപ്പോൾ ആരാധകർ ഉറ്റുനോക്കുന്നത്.