Photo: ISL
ഇന്ത്യൻ സൂപ്പർ ലീഗിൽ ആദ്യ പോയിന്റ് തേടി ഇന്റർ കാശിയും ഒഡീഷ എഫ്‌സിയും ഇന്ന് നേർക്കുനേർ. പൂനെയിലെ ബാലെവാഡി സ്റ്റേഡിയത്തിൽ വൈകിട്ട് 5 മണിക്കാണ് മത്സരം. തുടക്ക മത്സരങ്ങളിൽ തോൽവി വഴങ്ങിയ ഇരു ടീമുകൾക്കും സീസണിലെ ആദ്യ ജയം അനിവാര്യമാണ്.
ആദ്യ മത്സരത്തിൽ കേരള ബ്ലാസ്റ്റേഴ്സിനോട് 0–2ന് തോറ്റാണ് ഇന്റർ കാശി എത്തുന്നത്. ആ മത്സരത്തിൽ ആക്രമണത്തിൽ തിളങ്ങിയെങ്കിലും അവസരങ്ങൾ ഗോളാക്കാൻ ടീമിന് കഴിഞ്ഞിരുന്നില്ല. കാർലോസ് വാസ് പിന്റോയുടെ ടീം ഇത്തവണ അവസരങ്ങൾ മുതലാക്കി മൂന്ന് പോയിന്റ് നേടാനാണ് ലക്ഷ്യമിടുന്നത്. ടീം മത്സരിക്കാൻ തയ്യാറാണെന്നും മൂന്ന് പോയിന്റാണ് ലക്ഷ്യമെന്നും പരിശീലകൻ വ്യക്തമാക്കിയിട്ടുണ്ട്.
ഒഡീഷയ്ക്കും തുടക്കം നിരാശയായിരുന്നു. പഞ്ചാബ് എഫ്‌സിക്കെതിരെ തോയിബയുടെ ഗോളിൽ പിടിച്ചുനിന്നെങ്കിലും അവസാന നിമിഷ ഗോളിൽ 1–2ന് തോൽവി വഴങ്ങി. ടി ജി പുരുഷോത്തമന്റെ ടീം ഇത്തവണ തുടക്കത്തിലെ പിഴവുകൾ ആവർത്തിക്കാതെ മികച്ച പ്രകടനം ലക്ഷ്യമിടുന്നു. കഴിഞ്ഞ സീസണിലെ പോലെയല്ല, മുൻനിര സ്ഥാനത്തിനായി പോരാടണമെന്നാണ് പരിശീലകന്റെ നിലപാട്.
മുൻ ഒഡീഷ താരം കൂടിയായ ഹിതേഷ് ശർമ്മ ഇന്റർ കാശിക്കായി പുതിയ റോളിൽ ഇറങ്ങുന്നതും മത്സരത്തിലെ ശ്രദ്ധാകേന്ദ്രമാണ്. ആദ്യ ജയം ആരുടെ അക്കൗണ്ടിലാകും എന്നറിയാൻ ആരാധകർ കാത്തിരിക്കുകയാണ്.