Photo: EastMojo
ഇന്ത്യൻ ഫുട്ബോളിന് വലിയ വാർത്ത: നോർത്ത്ഈസ്റ്റ് യുണൈറ്റഡ് എഫ്സിക്ക് ഷില്ലോങിൽ ഫുട്ബോൾ അക്കാദമി തുടങ്ങാൻ മേഘാലയ മന്ത്രിസഭ 45 വർഷത്തേക്ക് ഭൂമി പാട്ടത്തിന് നൽകി. ന്യൂ ഷില്ലോങിലെ മാവ്ഖാനുവിൽ 19.99 ഏക്കർ ഭൂമിയാണ് ക്ലബ്ബിന് ലഭിക്കുക. 40 മുതൽ 50 കോടി രൂപ വരെയാണ് ക്ലബ്ബ് ഈ പദ്ധതിയിൽ നിക്ഷേപിക്കാൻ ഉദ്ദേശിക്കുന്നത്.
മൂന്ന് ഫുട്ബോൾ ഗ്രൗണ്ടുകൾ, താരങ്ങൾക്കുള്ള താമസസൗകര്യം, ആധുനിക പരിശീലന സൗകര്യങ്ങൾ എന്നിവയാണ് അക്കാദമിയിൽ ഒരുങ്ങുക. ഗ്രാസ്റൂട്ട് ഫുട്ബോളിനും പ്രൊഫഷണൽ പരിശീലനത്തിനുമിടയിലെ വിടവ് നികത്താൻ ഈ അക്കാദമി സഹായിക്കുമെന്ന് കായിക-യുവജനകാര്യ മന്ത്രി കൂടിയായ സർക്കാർ വക്താവ് വൈലാഡ്മിക്കി ഷില്ല പറഞ്ഞു. മേഘാലയയിലെ യുവതാരങ്ങൾക്ക് അന്താരാഷ്ട്ര നിലവാരത്തിൽ മത്സരിക്കാനുള്ള വഴി ഇതിലൂടെ തുറക്കുമെന്നും അദ്ദേഹം പ്രതീക്ഷ പ്രകടിപ്പിച്ചു.
ആദ്യം 30 വർഷത്തെ പാട്ടാണ് സർക്കാർ പരിഗണിച്ചതെങ്കിൽ ക്ലബ്ബ് 60 വർഷം ആവശ്യപ്പെട്ടു; ഒടുവിൽ 45 വർഷത്തിൽ ഇരുകൂട്ടരും ധാരണയിലെത്തുകയായിരുന്നു. ക്ലബ്ബിന്റെ മാനേജ്മെന്റ് ഗുവാഹത്തിയിൽ നിന്ന് ഷില്ലോങിലേക്ക് മാറ്റുന്നതിനെക്കുറിച്ചും ചർച്ചകൾ നടക്കുന്നുണ്ട്. അത് യാഥാർത്ഥ്യമായാൽ ഭാവിയിൽ ഐഎസ്എൽ, ഡ്യൂറന്റ് കപ്പ് മത്സരങ്ങൾ ഷില്ലോങിൽ നടക്കാനും വഴിയൊരുങ്ങും.
മേഘാലയയുടെ മിഷൻ ഫുട്ബോൾ പദ്ധതിയുടെ തുടർച്ചയായാണ് ഈ നീക്കം. സംസ്ഥാനത്ത് ഇതിനകം 125-ഓളം ഗ്രാസ്റൂട്ട് ഫുട്ബോൾ കേന്ദ്രങ്ങൾ പ്രവർത്തിക്കുന്നുണ്ട്. പ്രാദേശിക ക്ലബ്ബുകളെ ഒഴിവാക്കിയല്ല ഈ തീരുമാനമെന്നും മികച്ച പദ്ധതികളുമായി വരുന്ന മറ്റ് ക്ലബ്ബുകളെയും സർക്കാർ പിന്തുണയ്ക്കുമെന്നും മന്ത്രി വ്യക്തമാക്കി. നടൻ ജോൺ എബ്രഹാമിന്റെ ഉടമസ്ഥതയിലുള്ള നോർത്ത്ഈസ്റ്റ് യുണൈറ്റഡ് മേഘാലയ ടൂറിസത്തിന്റെ ബ്രാൻഡ് അംബാസഡർ കൂടിയാണ്.