Photo: BBC Sport
പ്രീമിയർ ലീഗ് ക്ലബ് പരിശീലക സ്ഥാനത്തേക്ക് ഒരു മടങ്ങിവരവ് താൻ കാണുന്നില്ലെന്ന് മുൻ ഇംഗ്ലണ്ട് പരിശീലകൻ ഗാരെത് സൗത്ത്ഗേറ്റ്. 56-കാരനായ അദ്ദേഹം ഒരു അഭിമുഖത്തിലാണ് തന്റെ നിലവിലെ മനോഭാവം വ്യക്തമാക്കിയത്.
യൂറോ 2024 ഫൈനലിൽ സ്പെയിനോട് തോറ്റതിന് ശേഷം ഇംഗ്ലണ്ട് സ്ഥാനം ഒഴിഞ്ഞതു മുതൽ സൗത്ത്ഗേറ്റ് പരിശീലകവൃത്തിയിൽ നിന്ന് വിട്ടുനിൽക്കുകയാണ്. അതിന് മുമ്പ് ഇംഗ്ലണ്ടിനെ യൂറോ 2020 ഫൈനലിലും എത്തിച്ചിരുന്നു. ക്ലബ് തലത്തിൽ അദ്ദേഹം അവസാനമായി പരിശീലിപ്പിച്ചത് 2006-ൽ തുടങ്ങിയ മിഡിൽസ്ബ്രോയിലെ മൂന്ന് വർഷത്തെ കാലഘട്ടത്തിലാണ്.
ഇംഗ്ലണ്ട് കാലഘട്ടത്തിന്റെ അവസാനത്തോടെ വിജയങ്ങൾ പോലും താൻ അധികം ആസ്വദിച്ചിരുന്നില്ലെന്നും, ഒരു ജയം ഏതാനും മിനിറ്റുകൾ മാത്രമേ സന്തോഷം നൽകിയിരുന്നുള്ളൂവെന്നും അദ്ദേഹം പറഞ്ഞു. അതിനുശേഷം ഫുട്ബോൾ കാണുന്നത് തന്നെ വളരെ കുറച്ചുവെന്നും, തന്റെ ടീമായ ക്രിസ്റ്റൽ പാലസ് ആദ്യ കിരീടം നേടിയ എഫ്എ കപ്പ് ഫൈനൽ കാണാൻ പോയതാണ് സമീപകാലത്തെ ഏക സ്റ്റേഡിയം സന്ദർശനമെന്നും അദ്ദേഹം കൂട്ടിച്ചേർത്തു.
പരിശീലകവേഷം അഴിച്ചതിന് ശേഷം മാധ്യമപ്രവർത്തനം, യുവാക്കൾ നേരിടുന്ന വെല്ലുവിളികളെക്കുറിച്ചുള്ള ഒരു ബിബിസി ഡോക്യുമെന്ററി, ഹാർവാർഡ് ബിസിനസ് സ്കൂളിലെ സന്ദർശക അധ്യാപനം തുടങ്ങി വ്യത്യസ്ത മേഖലകളിലാണ് സൗത്ത്ഗേറ്റ് സമയം ചെലവഴിക്കുന്നത്. കഴിഞ്ഞ ഒന്നര വർഷത്തെ വ്യത്യസ്ത അനുഭവങ്ങൾ താൻ ഏറെ ആസ്വദിച്ചുവെന്നും അദ്ദേഹം പറഞ്ഞു.