നാളെ (നവംബർ 5) വൈകിട്ട് 5 മണിക്ക് ഫറ്റോർഡയിൽ ചർച്ചിൽ ബ്രദേഴ്സും നോർത്ത് ഈസ്റ്റ് യുണൈറ്റഡും ഏറ്റുമുട്ടുമ്പോൾ കളിയുടെ ഗതി നിർണയിക്കുക മൂന്ന് താര പോരാട്ടങ്ങളാകും. ഇരു ടീമുകളും ആദ്യമായാണ് പരസ്പരം ഏറ്റുമുട്ടുന്നത് എന്നതും ഈ മത്സരത്തെ കൂടുതൽ രസകരമാക്കുന്നു.
ആദ്യ പോരാട്ടം ചർച്ചിലിന്റെ പ്രതിരോധക്കാരൻ ഗൗരവ് ബോറയും നോർത്ത് ഈസ്റ്റിന്റെ മൊറോക്കൻ സൂപ്പർ താരം അലാവുദ്ദീൻ അജറായിയും തമ്മിൽ. സ്ഥാനവും ശാരീരിക കരുത്തും കൊണ്ട് എതിർ മുന്നേറ്റക്കാരെ വിഷമിപ്പിക്കുന്ന താരമാണ് ബോറ. കഴിഞ്ഞ രണ്ട് കളിയിലും ഗോൾ കണ്ടെത്താനാകാത്ത അജറായി ഗോവയിൽ ഫോം വീണ്ടെടുക്കാനാണ് ഇറങ്ങുന്നത്.
രണ്ടാമത്തേത് ചർച്ചിലിന്റെ ഏറ്റവും മികച്ച താരം സെബാസ്റ്റ്യൻ ഗുട്ടിറസും നോർത്ത് ഈസ്റ്റിന്റെ പരിചയസമ്പന്നൻ എനെക്കോ സാട്രുസ്റ്റെഗിയും തമ്മിൽ. മൂന്ന് ഗോളും ഒരു അസിസ്റ്റുമായി ലീഗിലെ ജോയിന്റ് ടോപ് സ്കോററാണ് ഗുട്ടിറസ്; അദ്ദേഹത്തിന്റെ മൊത്തം ഗോൾ പങ്കാളിത്തം നാലാണ്. സ്പാനിഷ് പ്രതിരോധക്കാരൻ എനെക്കോയുടെ ശാരീരിക സാന്നിധ്യവും പരിചയവുമാണ് ഗുട്ടിറസിനെ തടയാൻ ഹൈലാൻഡേഴ്സിന്റെ ആയുധം.
മൂന്നാമത്തേത് ചർച്ചിലിന്റെ ലെഫ്റ്റ് ബാക്ക് മൈബം ഡെനി സിങ്ങും നോർത്ത് ഈസ്റ്റിന്റെ ഫോമിലുള്ള ജിതിൻ എംഎസും തമ്മിൽ. നാല് കളിയിൽ രണ്ട് ഗോളുമായി ഹൈലാൻഡേഴ്സിന്റെ ടോപ് സ്കോററാണ് ജിതിൻ; ബെംഗളൂരുവിനെതിരായ കഴിഞ്ഞ കളിയിൽ അദ്ദേഹത്തിന്റെ വേഗവും മികവും പ്രതിരോധത്തെ രണ്ടായി പിളർന്നിരുന്നു. ജിതിനെ പൂട്ടാനായാൽ ചർച്ചിലിന് മേൽക്കൈ ലഭിക്കും.