ചാമ്പ്യൻസ് ലീഗിൽ തുടർച്ചയായ നാലാം ജയം ലക്ഷ്യമിട്ട് നിലവിലെ ചാമ്പ്യന്മാരായ പാരിസ് സെന്റ് ജെർമൻ ഇന്ന് രാത്രി സ്പെയിനിൽ വിയ്യാറയലിനെ നേരിടും. എസ്റ്റാഡിയോ ഡി ലാ സെറാമിക്കയിൽ നടക്കുന്ന മത്സരത്തിൽ വിജയിച്ചാൽ ലീഗ് ഘട്ടത്തിലെ ഒന്നാം സ്ഥാനം പിഎസ്ജിക്ക് കൂടുതൽ ഉറപ്പിക്കാം.
ഇതുവരെ മൂന്ന് കളിയിൽ മൂന്ന് ജയവുമായാണ് പിഎസ്ജിയുടെ തുടക്കം. ബാഴ്സലോണയെയും മാഞ്ചസ്റ്റർ സിറ്റിയെയും പോലുള്ള വമ്പന്മാരെ വീഴ്ത്തിയാണ് ലൂയിസ് എൻറിക്കെയുടെ ടീം പോയിന്റ് പട്ടികയിൽ ഒന്നാമതെത്തിയത്. മൂന്ന് കളിയിൽ 14 ഗോളും ടീം അടിച്ചുകൂട്ടി.
എന്നാൽ കഴിഞ്ഞ വിജയങ്ങളിൽ മയങ്ങിയിരിക്കരുതെന്ന് എൻറിക്കെ താരങ്ങൾക്ക് മുന്നറിയിപ്പ് നൽകി. കഴിഞ്ഞ ഫലങ്ങൾ നാളത്തെ മത്സരം ജയിപ്പിക്കില്ലെന്നും എല്ലാ സാഹചര്യത്തിനും തയ്യാറായിരിക്കണമെന്നും അദ്ദേഹം പറഞ്ഞു. കഴിഞ്ഞ സീസണിൽ സമാനമായ തുടക്കം ഉണ്ടായിട്ടും ടോപ് എട്ടിൽ എത്താൻ ടീമിന് കഴിഞ്ഞില്ലെന്നും പരിശീലകൻ ഓർമിപ്പിച്ചു.
പരിക്ക് പിഎസ്ജിയെ വലയ്ക്കുന്നുണ്ട്. ഉസ്മാൻ ഡെംബലെ, മാർക്വിനോസ്, നൂനോ മെൻഡസ് എന്നിവർ ഇന്നും ടീമിലുണ്ടാകില്ല. കാൽമുട്ട് ശസ്ത്രക്രിയയ്ക്ക് ശേഷം ക്വാറട്സ്ഖേലിയ ദീർഘകാലം പുറത്താണ്.
വിയ്യാറയലിനെ നിസാരമായി കാണാനാകില്ല. ലാ ലിഗയിൽ എട്ടാം സ്ഥാനത്തുള്ള മഞ്ഞ സബ്മറീൻ കഴിഞ്ഞ ചാമ്പ്യൻസ് ലീഗ് മത്സരത്തിൽ ലിവർപൂളിനെതിരെ 2-0ന് മുന്നിൽ നിന്ന ശേഷമാണ് 4-3ന് തോറ്റത്. സ്വന്തം മൈതാനത്ത് ശക്തരായ വിയ്യാറയലിനെതിരെ പിഎസ്ജിക്ക് കടുത്ത പരീക്ഷണം തന്നെയാകും ഇന്നത്തെ മത്സരം.
