ക്രിസ്റ്റ്യാനോ ഇല്ല; എങ്കിലും വമ്പന്മാരുടെ പടയുമായി അൽ-നസർ നാളെ ഗോവയിൽ; എതിരിടാൻ എഫ്‌സി ഗോവ

ഫറ്റോർഡ: ഇന്ത്യൻ ഫുട്ബോൾ ആരാധകർ ആവേശത്തോടെ കാത്തിരുന്ന എഎഫ്‌സി ചാമ്പ്യൻസ് ലീഗ് 2 (AFC Champions League Two) മത്സരത്തിനായി സൗദി അറേബ്യൻ വമ്പന്മാരായ അൽ-നസർ എഫ്‌സി ഗോവയിലെത്തി. നാളെ (ഒക്ടോബർ 22, ബുധനാഴ്ച) ഫറ്റോർഡയിലെ പണ്ഡിറ്റ് ജവഹർലാൽ നെഹ്‌റു സ്റ്റേഡിയത്തിൽ നടക്കുന്ന മത്സരത്തിൽ ഐഎസ്എൽ ക്ലബ്ബായ എഫ്‌സി ഗോവയാണ് അൽ-നസറിന്റെ എതിരാളികൾ. ഇന്ത്യൻ സമയം രാത്രി 7:15-നാണ് മത്സരം ആരംഭിക്കുക.

ഏറ്റവും വലിയ സങ്കട വാർത്ത, സൂപ്പർതാരം ക്രിസ്റ്റ്യാനോ റൊണാൾഡോ ടീമിനൊപ്പം ഇന്ത്യയിലേക്ക് യാത്ര തിരിച്ചിട്ടില്ല എന്നതാണ്. ലോകകപ്പ് മത്സരങ്ങൾക്കായുള്ള മുന്നൊരുക്കത്തിന്റെ ഭാഗമായും ജോലിഭാരം കുറയ്ക്കുന്നതിനും വേണ്ടിയാണ് റൊണാൾഡോ മത്സരത്തിൽ നിന്ന് വിട്ടുനിൽക്കുന്നതെന്നാണ് റിപ്പോർട്ടുകൾ.

എങ്കിലും, റൊണാൾഡോയുടെ അഭാവത്തിലും അൽ-നസർ നിരയിൽ സൂപ്പർ താരങ്ങൾക്ക് പഞ്ഞമില്ല. മുൻ ലിവർപൂൾ താരവും സെനഗൽ നായകനുമായ സാദിയോ മാനെ, പോർച്ചുഗീസ് താരം ജോവോ ഫെലിക്സ്, ഇനിഗോ മാർട്ടിനെസ് തുടങ്ങിയ പ്രമുഖ താരങ്ങൾ ഗോവയ്‌ക്കെതിരെ ബൂട്ടണിയും.

ഗ്രൂപ്പ് 'ഡി'യിൽ കളിച്ച രണ്ട് മത്സരങ്ങളും ജയിച്ച് ആറ് പോയിന്റുമായി ഒന്നാം സ്ഥാനത്താണ് അൽ-നസർ. അതേസമയം, എഫ്‌സി ഗോവ തങ്ങളുടെ ആദ്യ രണ്ട് മത്സരങ്ങളിലും പരാജയപ്പെട്ട് ഗ്രൂപ്പിൽ അവസാന സ്ഥാനത്താണ്. ഇറാഖി ക്ലബ്ബായ അൽ-സവ്‌റ, താജിക്കിസ്ഥാൻ ക്ലബ്ബായ ഇസ്തിക്‌ലോൽ എന്നിവരോടാണ് ഗോവ പരാജയപ്പെട്ടത്.

ശക്തരായ അൽ-നസറിനെതിരെ യാഥാർത്ഥ്യബോധത്തോടെയാവണം കളിയെ സമീപിക്കേണ്ടതെന്ന് എഫ്‌സി ഗോവ പരിശീലകൻ മാനുവൽ മാർക്വെസ് അഭിപ്രായപ്പെട്ടു.

മത്സരം എവിടെ കാണാം?

മത്സരം ഇന്ത്യൻ ടിവി ചാനലുകളിൽ തത്സമയ സംപ്രേക്ഷണം ഉണ്ടായിരിക്കുന്നതല്ല. എന്നാൽ 'ഫാൻകോഡ്' ലും ഫുട്ബോൾ ലോകം സൈറ്റിലും മത്സരം തത്സമയം കാണാൻ സാധിക്കും.