അമേരിക്കൻ സൂപ്പർതാരം ക്രിസ്റ്റ്യൻ പുലിസിച്ച് എസി മിലാനിൽ തുടരും. 28-കാരനായ താരം ക്ലബ്ബുമായുള്ള കരാർ 2031 ജൂൺ 30 വരെ പുതുക്കിയതായി മിലാൻ വെള്ളിയാഴ്ച ഔദ്യോഗികമായി അറിയിച്ചു. നേരത്തെ 2027 വരെയായിരുന്നു പുലിസിച്ചിന്റെ കരാർ.
2023 ജൂലൈയിൽ ചെൽസിയിൽ നിന്നാണ് പുലിസിച്ച് മിലാനിലെത്തിയത്. അന്നുമുതൽ ടീമിന്റെ അവിഭാജ്യ ഘടകമായി മാറിയ താരം ഇതുവരെ 141 മത്സരങ്ങളിൽ 44 ഗോളും 28 അസിസ്റ്റും നേടിയിട്ടുണ്ട്. 2024-25 സീസണിൽ ക്ലബ്ബിന്റെ ടോപ് സ്കോററും പുലിസിച്ച് ആയിരുന്നു.
പുതിയ കരാറോടെ താരത്തിന്റെ പ്രതിഫലവും ഉയരുമെന്നാണ് റിപ്പോർട്ടുകൾ. നിലവിൽ പ്രതിവർഷം 4 മില്യൺ യൂറോയാണ് പുലിസിച്ച് വാങ്ങുന്നത്; ഇത് 5 മില്യൺ യൂറോയായി ഉയരുമെന്നാണ് സൂചന. ലോകകപ്പിനിടെ പരിക്കേറ്റതിനാൽ പ്രീ-സീസണിന്റെ ഭൂരിഭാഗവും നഷ്ടമായെങ്കിലും പരിശീലകൻ റൂബൻ അമോറിമിന്റെ കീഴിൽ താരം വീണ്ടും ടീമിന്റെ പ്രധാന ശക്തിയായി മാറിയിരിക്കുകയാണ്. നമ്പർ 10 റോളിലും വിങ്ങിലും ഒരുപോലെ കളിക്കാൻ കഴിയുന്ന താരമാണ് പുലിസിച്ച്.
കരാർ പുതുക്കൽ പ്രഖ്യാപിച്ചുകൊണ്ട് മിലാൻ പുറത്തിറക്കിയ കുറിപ്പിൽ, സാങ്കേതിക മികവും സ്വഭാവവും സ്ഥിരതയും അർപ്പണബോധവും കൊണ്ട് ടീമിന്റെ പ്രധാന താരമായി പുലിസിച്ച് മാറിയെന്ന് ക്ലബ് പറഞ്ഞു. ഒരുമിച്ച് ഇനിയും മുന്നോട്ടുപോകാനും പുതിയ നാഴികക്കല്ലുകൾ പിന്നിടാനുമുള്ള പങ്കിട്ട പ്രതിബദ്ധതയാണ് ഈ കരാർ പ്രതിഫലിപ്പിക്കുന്നതെന്നും ക്ലബ് കൂട്ടിച്ചേർത്തു. “ക്യാപ്റ്റൻ അമേരിക്കയുടെ റോസ്സോനേരി ദൗത്യം തുടരുന്നു” എന്ന വാചകത്തോടെയാണ് മിലാൻ വാർത്ത അറിയിച്ചത്.
അമേരിക്കൻ ദേശീയ ടീമിനായി 90 മത്സരങ്ങളിൽ 33 ഗോളാണ് പുലിസിച്ചിന്റെ സമ്പാദ്യം. 2022, 2026 ലോകകപ്പുകളിൽ യുഎസ്എയ്ക്കായി കളിച്ച താരം നാല് തവണ യുഎസ് സോക്കർ മികച്ച പുരുഷ താരമായും തിരഞ്ഞെടുക്കപ്പെട്ടിട്ടുണ്ട്. ചെൽസിയിൽ 2021 ചാമ്പ്യൻസ് ലീഗ് നേടിയ താരം, മിലാനിൽ ഇനിയും വർഷങ്ങളോളം തുടരുമെന്നുറപ്പായതോടെ ആരാധകർക്കും വലിയ ആശ്വാസമാണ്.