Photo: Getty Images
ലോക ഫുട്ബോളിലെ അധികാര പോരാട്ടം പുതിയ ഘട്ടത്തിലേക്ക്. ഭരണവും തീരുമാനങ്ങളുമായി ബന്ധപ്പെട്ട സുപ്രധാന രേഖകൾ പുറത്തുവിടാനും എല്ലാ ചോദ്യങ്ങൾക്കും മറുപടി നൽകാനും ഫിഫയ്ക്ക് നവംബർ 2 വരെ സമയപരിധി നിശ്ചയിച്ച് യൂറോപ്യൻ ഫുട്ബോൾ സംഘടനയായ യുവേഫ രംഗത്ത്. ഫിഫ പ്രസിഡന്റ് ജിയാന്നി ഇൻഫാന്റിനോയ്ക്ക് യുവേഫ ജനറൽ സെക്രട്ടറി തിയോഡോർ തിയോഡോറിഡിസ് അയച്ച കത്തിലാണ് ഈ അന്ത്യശാസനം.
കഴിഞ്ഞ വ്യാഴാഴ്ച നടന്ന ഫിഫ കൗൺസിൽ യോഗത്തിൽ ലോകകപ്പ് ഓഹരി വിൽപ്പന പദ്ധതിയുടെ പേരിൽ ഇൻഫാന്റിനോ മാപ്പ് പറഞ്ഞിരുന്നു. എന്നാൽ ആ പദ്ധതി എങ്ങനെ രൂപപ്പെട്ടു എന്നതിനെക്കുറിച്ച് വ്യക്തമായ വിശദീകരണം അദ്ദേഹം നൽകിയില്ലെന്ന് യുവേഫ ചൂണ്ടിക്കാട്ടുന്നു. നിരവധി അടിസ്ഥാന ചോദ്യങ്ങൾക്ക് ഇപ്പോഴും ഉത്തരം ലഭിച്ചിട്ടില്ലെന്നും ആവശ്യപ്പെട്ട വിവരങ്ങളും രേഖകളും കൈമാറിയിട്ടില്ലെന്നുമാണ് കത്തിലെ പ്രധാന ആരോപണം.
എട്ട് പേജുകളിലായി 42 ചോദ്യങ്ങളാണ് യുവേഫ ഉന്നയിച്ചിരിക്കുന്നത്. സ്വകാര്യ നിക്ഷേപ പദ്ധതിയായ ഫിഫ ഫോർവേഡ് എന്റർപ്രൈസ് (FFE), ഫിഫ സമാധാന പുരസ്കാരം, ലോകകപ്പിൽ അമേരിക്കൻ താരം ഫോളാരിൻ ബാലോഗന് ലഭിച്ച വിലക്ക് സസ്പെൻഡ് ചെയ്ത വിവാദ തീരുമാനം എന്നിവയെല്ലാം ചോദ്യങ്ങളിൽ ഉൾപ്പെടുന്നു. FFE പിൻവലിച്ചതും തെറ്റുകൾ സമ്മതിച്ചതും ഭരണപരിഷ്കാരങ്ങൾ പ്രഖ്യാപിച്ചതും മാത്രം പോരാ — തീരുമാനങ്ങൾ എങ്ങനെ എടുത്തു, യഥാസമയം ഫിഫ കൗൺസിലിനെ എന്തുകൊണ്ട് ഉൾപ്പെടുത്തിയില്ല എന്നതിനാണ് മറുപടി വേണ്ടതെന്ന് യുവേഫ വ്യക്തമാക്കുന്നു.
രേഖകൾ നൽകാൻ വിസമ്മതിക്കുന്നുണ്ടെങ്കിൽ ഓരോ കേസിലും അതിനുള്ള കൃത്യമായ കാരണം വിശദീകരിക്കണമെന്നും കത്തിൽ ആവശ്യപ്പെടുന്നു. ഈ ചോദ്യങ്ങൾക്ക് ഇപ്പോൾ തന്നെ ഉത്തരം വേണം; അടുത്ത ഫിഫ കൗൺസിൽ യോഗം വരെ നീട്ടാനോ ഭാവിയിലെ പരിഷ്കാരങ്ങൾ കൊണ്ട് ഇതിനകം എടുത്ത തീരുമാനങ്ങളുടെ പരിശോധന ഒഴിവാക്കാനോ കഴിയില്ലെന്നും യുവേഫ കർശനമായി പറയുന്നു. അതേസമയം, സമയപരിധി പാലിച്ചില്ലെങ്കിൽ എന്ത് നടപടിയെടുക്കുമെന്ന് യുവേഫ വെളിപ്പെടുത്തിയിട്ടില്ല.
ബാലോഗൻ വിഷയത്തിലും വിശദമായ ചോദ്യങ്ങളുണ്ട്. ലോകകപ്പിൽ ചുവപ്പ് കാർഡ് കണ്ട താരത്തിന്റെ വിലക്ക് ഫിഫ അച്ചടക്ക സമിതി പിൻവലിച്ചത് അമേരിക്കൻ പ്രസിഡന്റ് ഡൊണാൾഡ് ട്രംപ് ഇൻഫാന്റിനോയോട് തീരുമാനം പുനഃപരിശോധിക്കാൻ ആവശ്യപ്പെട്ടതിന് പിന്നാലെയായിരുന്നു. ട്രംപ് കൃത്യമായി എന്താണ് ആവശ്യപ്പെട്ടത്, അതിന് ശേഷം ഫിഫയ്ക്കുള്ളിൽ ആരുമായൊക്കെ ചർച്ച നടന്നു തുടങ്ങിയ വിവരങ്ങളാണ് യുവേഫ തേടുന്നത്.
കൗൺസിലിന് ശേഷം ഇംഗ്ലീഷ് എഫ്.എ. അധ്യക്ഷയും ഫിഫ വൈസ് പ്രസിഡന്റുമായ ഡെബി ഹെവിറ്റിന്റെ പ്രതികരണം ശ്രദ്ധേയമായിരുന്നു. ഈ ചോദ്യങ്ങൾക്ക് ഇൻഫാന്റിനോ മറുപടി നൽകിയില്ലെങ്കിൽ അദ്ദേഹം ഫിഫ പ്രസിഡന്റാകാൻ യോഗ്യനല്ലെന്നാണ് അവർ പറഞ്ഞത്. 2016 മുതൽ ഫിഫ പ്രസിഡന്റായ ഇൻഫാന്റിനോ മൂന്നാം തവണയും തിരഞ്ഞെടുപ്പിൽ മത്സരിക്കാനൊരുങ്ങുന്നതിനിടെയാണ് യുവേഫയുടെ ഈ നീക്കം. വിഷയത്തിൽ ഫിഫയുടെ പ്രതികരണം തേടിയിട്ടുണ്ട്.